​धारूर: शहरापासून अवघ्या तीन किलोमीटर अंतरावर असलेल्या अंबाचोंडी माता मंदिराकडे जाणाऱ्या अत्यंत खराब रस्त्याची दुरुस्ती स्थानिक सामाजिक कार्यकर्ते आणि उद्योजक विजयसिंह उदयसिंह दिक्खत यांनी स्वखर्चातून केली आहे. नवरात्रोत्सवानिमित्त हजारो भाविक मंदिरात दर्शनासाठी येत असताना प्रशासनाने रस्त्याकडे केलेल्या अक्षम्य दुर्लक्षामुळे दिक्खत यांनी स्वतः पुढाकार घेत रस्त्यावरील खड्डे बुजवून भाविकांना मोठा दिलासा दिला आहे.

​प्रशासनाची उदासीनता आणि भाविकांचे हाल

अंबाचोंडी माता मंदिरावर परिसरातील हजारो भाविकांची मोठी श्रद्धा आहे. मात्र, या मंदिराकडे जाणाऱ्या रस्त्याची गेल्या अनेक वर्षांपासून अत्यंत दुर्दशा झाली होती. रस्त्यावरील मोठमोठ्या खड्ड्यांमुळे दुचाकी आणि चारचाकी वाहनधारकांना मोठी कसरत करावी लागत होती. खड्डे चुकवण्याच्या प्रयत्नात लहान-मोठे अपघात होण्याची भीती निर्माण झाली होती. या रस्त्याच्या दुरुस्तीसाठी स्थानिक लोकप्रतिनिधी आणि प्रशासनाकडे वारंवार निवेदने देऊनही कोणतीही ठोस उपाययोजना करण्यात आली नाही. नवरात्रोत्सवाच्या काळात भाविकांची गर्दी वाढल्याने खराब रस्त्यावरून प्रवास करणे नागरिकांसाठी आणि कुटुंबासह येणाऱ्या भाविकांसाठी मोठी डोकेदुखी ठरत होते.

कायमस्वरूपी चांगल्या रस्त्याची मागणी

प्रशासनाच्या या ढिम्म कारभारामुळे अखेर उद्योजक विजयसिंह दिक्खत यांनी स्वतःचे आर्थिक योगदान देत रस्त्याची दुरुस्ती केली असली तरी, हा मार्ग कायमस्वरूपी चांगला करण्याची मागणी आता जोर धरू लागली आहे. केवळ नवरात्रोत्सवातच नव्हे, तर वर्षभर भाविक देवीच्या दर्शनासाठी या ठिकाणी मोठ्या संख्येने येत असतात. त्यामुळे प्रशासनाने आणि लोकप्रतिनिधींनी या समस्येकडे गांभीर्याने लक्ष देऊन या रस्त्याचे कायमस्वरूपी पक्के काम करावे, अशी आग्रही मागणी आता परिसरातील नागरिकांकडून केली जात आहे.