अंबाजोगाई :- कै. राईबाई बलभीम पवार यांच्या स्मृतिदिनानिमित्त येथील स्वामी रामानंद तीर्थ ग्रामीण शासकीय वैद्यकीय महाविद्यालय व रुग्णालयाच्या रक्तपेढीत २५ पिशव्या रक्तदान करण्यात आले. या सामाजिक उपक्रमांतर्गत उद्याही आणखी ५ पिशव्या रक्तदान केले जाणार आहे. रक्तपेढीत रक्ताचा तीव्र तुटवडा असल्याने आणि सणासुदीमुळे कर्मचाऱ्यांची संख्या मर्यादित असल्यामुळे आयोजकांनी घरगुती कार्यक्रमाऐवजी थेट रक्तपेढीत जाऊन रक्तदान करण्याचा स्तुत्य निर्णय घेतला.

हा रक्तदानाचा उपक्रम मूळ नियोजनानुसार घरीच आयोजित करण्यात येणार होता. मात्र, अंबाजोगाईतील या शासकीय रक्तपेढीत रक्ताचा साठा अत्यंत कमी झाला असून गरजू रुग्णांना रक्ताची नितांत आवश्यकता असल्याची माहिती आयोजकांना मिळाली. तसेच, सध्या सणासुदीच्या कालावधीमुळे रक्तपेढीत कर्मचाऱ्यांची संख्याही कमी आहे. कर्मचाऱ्यांवरील ताण कमी व्हावा आणि रुग्णांना तात्काळ रक्ताची मदत मिळावी, या उदात्त हेतूने हा कार्यक्रम थेट स्वामी रामानंद तीर्थ वैद्यकीय महाविद्यालयाच्या रक्तपेढीतच घेण्याचे निश्चित करण्यात आले.

समाजापुढे आदर्श ठेवणारा उपक्रम

कै. राईबाई बलभीम पवार यांच्या स्मृतींना उजाळा देताना केवळ औपचारिक कार्यक्रम न घेता, गरजू रुग्णांचे प्राण वाचवण्यासाठी रक्तदानासारखा सामाजिक उपक्रम राबवण्यात आला. पहिल्या दिवशी २५ रक्तदात्यांनी उत्स्फूर्तपणे रक्तदान करून आपले सामाजिक दायित्व निभावले असून, उद्या उर्वरित ५ जण रक्तदान करणार आहेत. आयोजकांच्या या समयसूचकतेचे आणि सामाजिक बांधिलकीचे सर्व स्तरांतून कौतुक होत आहे.