बीड: प्रादेशिक हवामान केंद्र मुंबई आणि वसंतराव नाईक मराठवाडा कृषी विद्यापीठ परभणी यांच्याकडून प्राप्त झालेल्या ताज्या अंदाजानुसार, मराठवाड्यातील अनेक जिल्ह्यांमध्ये पुढील काही दिवस मेघगर्जनेसह मुसळधार ते मध्यम स्वरूपाच्या पावसाची शक्यता वर्तवण्यात आली आहे. या बदलत्या हवामानाचा थेट परिणाम शेतीतील उभ्या पिकांवर होणार असल्याने शेतकऱ्यांनी योग्य ती काळजी घेण्याचे आवाहन प्रशासनाकडून करण्यात आले आहे. विशेषतः नांदेड, लातूर आणि धाराशिव जिल्ह्यांमध्ये पावसाचा जोर अधिक राहण्याची शक्यता असून ताशी ४० ते ५० किलोमीटर वेगाने वारे वाहतील असा अंदाज आहे.
हवामान विभागाच्या सविस्तर अंदाजानुसार, २२ आणि २३ सप्टेंबर रोजी नांदेड आणि लातूर भागात तर २३ तारखेला धाराशिव जिल्ह्यात वादळी वाऱ्यासह मुसळधार पावसाची शक्यता आहे. २४ आणि २५ सप्टेंबर रोजी हिंगोली आणि नांदेड जिल्ह्यांतही अशाच प्रकारच्या पावसाचा इशारा देण्यात आला आहे. याशिवाय, छत्रपती संभाजीनगर, जालना, परभणी आणि बीड जिल्ह्यांमध्ये काही ठिकाणी विजांच्या कडकडाटासह आणि ३० ते ४० किलोमीटर वेगाच्या वाऱ्यासह हलका ते मध्यम स्वरूपाचा पाऊस पडण्याची शक्यता आहे. या काळामध्ये वादळी वारे आणि अचानक येणारा पाऊस यामुळे पिकांचे मोठे नुकसान होऊ शकते, त्यामुळे शेतकऱ्यांनी विशेष खबरदारी घेणे गरजेचे आहे.
या बदलत्या हवामानाच्या पार्श्वभूमीवर कृषी विद्यापीठाने शेतकऱ्यांसाठी महत्त्वाचा कृषी सल्ला जारी केला आहे. पुढील तीन ते चार दिवस पावसाची शक्यता असल्याने शेतकऱ्यांनी पिकांवरील कोणतीही फवारणी तात्काळ थांबवावी, असे सुचवण्यात आले आहे. स्वच्छ आणि कोरडे हवामान असतानाच फवारणीची कामे हाती घ्यावीत. तसेच, शेतात किंवा बागेत साचलेल्या अतिरिक्त पाण्याचा तत्काळ निचरा करण्याची व्यवस्था करावी जेणेकरून पिकांची मुळे कुजणार नाहीत. काढणीला आलेल्या पिकांची सुरक्षित जागी साठवणूक करावी आणि जनावरांना खुल्या जागेत न बांधता सुरक्षित गोठ्यात बांधावे.
#MarathwadaWeather #AgricultureUpdate #MonsoonAlert #FarmersAdvisory #AgriNewsIndia
प्रतिक्रिया (०)
अद्याप प्रतिक्रिया नाहीत. पहिली प्रतिक्रिया तुम्हीच द्या!