केज विधानसभा मतदारसंघाच्या आमदार नमिता मुंदडा यांनी शुक्रवारी चिंचोलीमाळी शिवारात प्रत्यक्ष शेताच्या बांधावर जाऊन कोरड्या दुष्काळामुळे झालेल्या पीक नुकसानीची पाहणी केली. पावसाअभावी संकटात सापडलेल्या बळीराजाशी संवाद साधत त्यांनी प्रशासकीय पातळीवर आवश्यक ती सर्व मदत मिळवून देण्यासाठी शासनस्तरावर पाठपुरावा करण्याचे आश्वासन दिले.

नुकसानग्रस्त पिकांची पाहणी आणि शेतकऱ्यांना धीर

परिसरात पावसाने प्रदीर्घ खंड दिल्याने पिके करपून गेली असून शेतकरी वर्ग मोठ्या आर्थिक अडचणीत सापडला आहे. या पार्श्वभूमीवर आमदार नमिता मुंदडा यांनी शुक्रवारी सकाळी साडेनऊच्या सुमारास चिंचोलीमाळी शिवारातील बाधित शेतांना भेट दिली. यावेळी त्यांनी शेतकऱ्यांशी चर्चा करून पिकांची सद्यस्थिती, पाण्याची तीव्र टंचाई आणि चारा समस्येची सविस्तर माहिती जाणून घेतली. शेतकरी बांधवांनी धीर सोडू नये, या संकटकाळात शासन आणि लोकप्रतिनिधी म्हणून आपण पूर्ण ताकदीने त्यांच्या पाठीशी उभे असल्याचे त्यांनी नमूद केले.

प्रशासकीय अधिकारी व ग्रामस्थांची उपस्थिती

या पाहणी दौऱ्यादरम्यान कृषी आणि महसूल विभागाचे अधिकारी उपस्थित होते. आमदार मुंदडा यांनी संबंधित अधिकाऱ्यांना नुकसानीचे अचूक पंचनामे करण्याचे निर्देश दिले. यावेळी भाजप जिल्हा सचिव सुनील गलांडे पाटील, ॲड. शरद इंगळे, सुरेश नांदे, तालुका कृषी अधिकारी सागर पठाडे, मंडळ अधिकारी दयानंद मस्के, मंडळ कृषी अधिकारी कोठावळे, ग्राममहसूल अधिकारी धनाजी क्षीरसागर, कृषी सहायक रिंकल पवार, ग्रामपंचायत अधिकारी अनिता जाधव, पोलीस पाटील रेखा माळी-चिंचोलकर, चेअरमन अरुण काळे, उपसरपंच धीरज वनवे यांच्यासह विविध गावांचे सरपंच, उपसरपंच, स्थानिक पदाधिकारी आणि शेतकरी मोठ्या संख्येने उपस्थित होते.