उत्तर प्रदेशातील मेरठ येथे संपूर्ण देशाला हादरवून सोडणाऱ्या बहुचर्चित 'ब्लू ड्रम' हत्याकांड प्रकरणात जिल्हा न्यायालयाने बुधवारी (१४ ऑक्टोबर) ऐतिहासिक निकाल दिला आहे. मर्चंट नेव्हीतील माजी अधिकारी सौरभ राजपूत यांची निर्घृण हत्या करणारी त्याची पत्नी मुस्कान रस्तोगी आणि तिचा प्रियकर साहिल शुक्ला या दोघांनाही न्यायालयाने फाशीची शिक्षा सुनावली आहे.

मिळालेल्या माहितीनुसार, ३ मार्च २०२५ रोजी मेरठच्या ब्रह्मपुरी परिसरात ही क्रूर घटना घडली होती. पत्नी मुस्कान हिने प्रियकर साहिलच्या मदतीने पती सौरभ राजपूत याची घरातच हत्या केली. त्यानंतर पुरावा नष्ट करण्यासाठी या दोघांनी सौरभच्या मृतदेहाचे तब्बल १५ तुकडे केले. हे तुकडे एका निळ्या रंगाच्या प्लास्टिक ड्रममध्ये भरून त्यावर सिमेंट आणि वाळूचे मिश्रण ओतून तो ड्रम बंद केला होता. हा भयंकर गुन्हा केल्यानंतर दोघेही कुठेही काहीच न घडल्यासारखे हिमाचल प्रदेशात फिरायला गेले होते. १८ मार्च रोजी या हत्येचा भंडाफोड झाल्यानंतर पोलिसांनी निळा ड्रम कापून मृतदेह बाहेर काढला आणि दोघांना बेड्या ठोकल्या.

सुमारे १३ महिने चाललेल्या या खटल्यात १२६ सुनावण्या पार पडल्या आणि २२ साक्षीदारांचे जबाब नोंदवण्यात आले. हा गुन्हा 'दुर्मिळातील दुर्मिळ' आणि माणुसकीला काळीमा फासणारा असल्याचे मानून न्यायालयाने या दोन्ही नराधमांना फाशीची शिक्षा ठोठावली असून, यामुळे राजपूत कुटुंबाला अखेर न्याय मिळाला आहे.