बीड शहरातील शिंदेनगर फेज ३ भागात भररात्री बंद घराचा कडी-कोंडा तोडून अज्ञात चोरट्यांनी दोन महागडे मोबाईल फोन लांबवल्याची घटना उघडकीस आली आहे. शिंदेनगर भागात राहणारे शिक्षक आशुतोष नाथ चौबे हे ५ ऑक्टोबर रोजी मध्यरात्री साडेबाराच्या सुमारास पत्नीसह घरात झोपलेले होते. अज्ञात चोरट्याने घराच्या गॅलरीच्या दरवाजाचा कडी-कोंडा तोडून घरात प्रवेश केला. बेडरूममध्ये चार्जिंगला लावलेले विवो आणि सॅमसंग कंपनीचे एकूण २२ हजार रुपये किमतीचे दोन मोबाईल चोरून चोरटा अंधाराचा फायदा घेत पसार झाला. सकाळी चोरीचा प्रकार लक्षात आल्यानंतर आशुतोष चौबे यांनी तात्काळ शिवाजीनगर पोलीस ठाण्यात फिर्याद दिली. पोलिसांनी अज्ञात चोरट्याविरुद्ध घरफोडीचा गुन्हा दाखल केला असून शहरात वाढत्या चोऱ्यांमुळे नागरिकांमध्ये चिंतेचे वातावरण आहे. पोलीस हवालदार मुंडे या चोरीचा पुढील तपास करत आहेत.