बीड जिल्ह्यातील वडवणी तालुक्यातील मोरवड येथील मूळ रहिवासी असलेल्या २९ वर्षीय तरुणाचे अज्ञात कारणावरून अपहरण झाल्याची धक्कादायक घटना उघडकीस आली आहे. या प्रकरणी तरुणाच्या वृद्ध आईने दिलेल्या फिर्यादीवरून वडवणी पोलीस ठाण्यात अज्ञाताविरुद्ध गुन्हा दाखल करण्यात आला आहे.

दिनेश तुकाराम मुजमुले (वय २९, मूळ रा. मोरवड, सध्या रा. मोशी, पुणे) असे अपहरण झालेल्या तरुणाचे नाव आहे. पोलिसांकडून मिळालेल्या अधिकृत माहितीनुसार, गुरुवारी (१० सप्टेंबर) सकाळी अकरा वाजेच्या सुमारास हरिश्चंद्र पिंप्री येथून दिनेशला अज्ञात व्यक्तीने अज्ञात कारणासाठी पळवून नेले. या अनपेक्षित घटनेमुळे कुटुंबाला मोठा धक्का बसला असून, दिनेशची आई कौशल्या तुकाराम मुजमुले (वय ६०) यांनी शुक्रवारी दुपारी वडवणी पोलिसांत धाव घेत रीतसर तक्रार नोंदवली.

या फिर्यादीवरून पोलिसांनी तात्काळ दखल घेत भारतीय न्याय संहिता २०२३ च्या कलम १४०(३) अन्वये अपहरणाचा गुन्हा दाखल केला आहे. या प्रकरणाचे गांभीर्य लक्षात घेत पोलीस हेड कॉन्स्टेबल ढोबळे हे पुढील तपास करत असून, अपहरणकर्त्याचा आणि दिनेशचा शोध घेण्यासाठी पोलिसांकडून कसून प्रयत्न केले जात आहेत.