बीड: जिल्ह्यातील वाढती लोकसंख्या, विस्तारणारे भौगोलिक क्षेत्र आणि कायदा-सुव्यवस्थेचे बदलते स्वरूप लक्षात घेऊन बीड जिल्ह्यात चार नवीन पोलीस ठाणी स्थापन करण्याच्या हालचालींना वेग आला आहे. खा. बजरंग सोनवणे यांनी मुख्यमंत्री यांच्याकडे केलेल्या मागणीची गंभीर दखल घेत बीडचे पोलीस अधीक्षक नवनीत काँवत यांनी संबंधित पोलीस अधिकाऱ्यांकडून तातडीने सविस्तर अहवाल मागवला आहे. या प्रशासकीय निर्णयामुळे जिल्ह्यातील पोलिसांचा घटनास्थळी पोहोचण्याचा प्रतिसाद वेळ कमी होऊन नागरिकांच्या सुरक्षेला अधिक बळ मिळणार आहे.

विभाजनाचे नियोजन व हद्दीचा आढावा

प्रशासनाच्या विचाराधीन असलेल्या प्रस्तावानुसार, आष्टी आणि अंभोरा पोलीस ठाण्याचे विभाजन करून नवीन 'कडा पोलीस ठाणे' निर्माण करण्याची योजना आखण्यात आली आहे. याशिवाय वाढत्या नागरीकरणामुळे बीड शहरातील शिवाजीनगर पोलीस ठाण्याचे विभाजन करून 'शाहूनगर पोलीस ठाणे', गेवराई पोलीस ठाण्याच्या अवाढव्य हद्दीचे विभाजन करून 'गेवराई ग्रामीण पोलीस ठाणे' आणि केज तालुक्यात नागरिकांच्या सोयीसाठी आणखी एका नवीन पोलीस ठाण्याची निर्मिती प्रस्तावित करण्यात आली आहे.

खा. बजरंग सोनवणे यांनी १० ऑगस्ट २०२६ रोजी मुख्यमंत्र्यांना पत्र लिहून बीडच्या भौगोलिक विस्ताराचा मुद्दा मांडत नव्या पोलीस ठाण्यांची निकड अधोरेखित केली होती. सध्याचे कार्यक्षेत्र मोठे असल्याने पोलीस यंत्रणेवर प्रचंड ताण येत असून दुर्गम भागात पोहोचण्यास विलंब होतो. पोलीस अधीक्षक कार्यालयाने यावर सकारात्मक पाऊल उचलल्याने या चारही पोलीस ठाण्यांना लवकरच अंतिम मंजुरी मिळण्याची शक्यता निर्माण झाली असून, यामुळे बीड जिल्ह्याची सुरक्षा यंत्रणा अधिक गतिमान आणि सक्षम होणार आहे.