बीड : पावसाने दिलेल्या प्रदीर्घ ओढ्यामुळे बीड जिल्ह्यात निर्माण झालेल्या गंभीर दुष्काळी परिस्थितीवर मात करण्यासाठी आणि टंचाई निवारणासाठी प्रशासनाने सर्व उपाययोजना युद्धपातळीवर राबवाव्यात, असे निर्देश राज्याच्या उपमुख्यमंत्री तथा जिल्ह्याच्या पालकमंत्री सुनेत्रा अजित पवार यांनी दिले. बीड जिल्हाधिकारी कार्यालयात आयोजित आढावा बैठकीत त्या बोलत होत्या. या बैठकीला लोकप्रतिनिधींसह जिल्हा प्रशासनातील सर्व प्रमुख विभागांचे वरिष्ठ अधिकारी उपस्थित होते.

पंचनामे तात्काळ पूर्ण करण्याचे निर्देश

पावसाअभावी हाताशी आलेली पिके जळून गेल्याने बीड जिल्ह्यातील शेतकरी संकटात सापडला आहे. या पार्श्वभूमीवर उर्वरित पीक नुकसानाचे पंचनामे विनाविलंब पूर्ण करून अहवाल सादर करण्याचे आदेश उपमुख्यमंत्र्यांनी कृषी व महसूल विभागाला दिले. तसेच नुकसान भरपाई आणि पीक विमा वितरणाच्या प्रक्रियेत पारदर्शकता ठेवून शेतकऱ्यांना वेळेत दिलासा द्यावा, अशी सूचना त्यांनी केली.

पिण्याचे पाणी व चारा व्यवस्थापनावर भर जिल्ह्यात पिण्याच्या पाण्याला सर्वोच्च प्राधान्य देण्यात आले असून सध्या सुरू असलेल्या २२५ टँकर्सवर जीपीएसद्वारे कडक देखरेख ठेवण्याचे निर्देश देण्यात आले आहेत. पिण्याच्या पाण्याचा अपव्यय टाळण्यासाठी बांधकामासाठी त्याचा वापर करण्यास मनाई करण्यात आली आहे. जलस्रोतांचे पुनर्भरण, विहिरींची दुरुस्ती आणि खोलीकरणाची कामे त्वरित हाती घेण्यात यावीत. जनावरांच्या चाऱ्याची टंचाई भासू नये म्हणून प्रशासनाने हायड्रोपोनिक्स, मुरघास व अझोला चारा निर्मितीसाठी शेतकऱ्यांना मार्गदर्शन करावे, असेही त्यांनी नमूद केले.

स्थानिक पातळीवर रोजगार आणि शेतकरी समुपदेशन

ग्रामीण भागातील नागरिकांचे स्थलांतर रोखण्यासाठी रोजगार हमी योजनेची कामे थेट जलसंधारणाशी जोडून तत्काळ सुरू करण्याचे आदेश देण्यात आले. सर्व शासकीय अधिकारी-कर्मचाऱ्यांनी मुख्यालयातच उपस्थित राहून टंचाई निवारणात सक्रिय राहावे आणि संकटात सापडलेल्या शेतकऱ्यांना मानसिक आधार द्यावा, असे आवाहन उपमुख्यमंत्र्यांनी केले. या संकटाच्या काळात नागरिकांनी अनावश्यक खर्च टाळून काटकसर करावी, असे आवाहन करत शासन सर्वतोपरी पाठीशी खंबीरपणे उभे असल्याची ग्वाही त्यांनी दिली.