अंबाजोगाई : तालुक्यातील मोरेवाडी येथील बनेश्वर शिक्षण संस्था संचलित गुरुदेव विद्यालयाचा इयत्ता दहावीचा विद्यार्थी आदित्य संतोष सुरवसे याने विभागस्तरीय शालेय मैदानी क्रीडा स्पर्धेत हॅमर थ्रो प्रकारात द्वितीय क्रमांक पटकावून घवघवीत यश संपादन केले. या चमकदार कामगिरीच्या जोरावर आदित्यची आगामी राज्यस्तरीय शालेय मैदानी क्रीडा स्पर्धेसाठी निवड झाली आहे.

विभागीय स्पर्धेत उत्कृष्ट कामगिरी

महाराष्ट्र शासनाच्या शालेय शिक्षण व क्रीडा विभागांतर्गत, क्रीडा व युवक सेवा संचालनालय (पुणे) यांच्या मार्गदर्शनाखाली २१ ऑक्टोबर रोजी विभागीय क्रीडा संकुल, परभणी येथे विभागस्तरीय स्पर्धा पार पडल्या. जिल्हा क्रीडा अधिकारी कार्यालय, परभणी आणि जिल्हा मैदानी असोसिएशन यांच्या संयुक्त विद्यमाने आयोजित या स्पर्धेत १७ वर्षांखालील वयोगटात आदित्यने सहभाग नोंदवला होता. हॅमर थ्रो क्रीडा प्रकारात त्याने तांत्रिक कौशल्य आणि ताकदीच्या जोरावर द्वितीय क्रमांक मिळवून पालघर येथील विभागीय क्रीडा संकुलात होणाऱ्या राज्यस्तरीय स्पर्धेचे तिकीट निश्चित केले.

शाळा व्यवस्थापनाकडून अभिनंदन व कौतुक

आदित्यच्या या यशाबद्दल बनेश्वर शिक्षण संस्थेचे अध्यक्ष भागवत गोरे आणि सचिव डॉ. नरेंद्र काळे यांनी त्याचे अभिनंदन करून राज्यस्तरीय स्पर्धेसाठी शुभेच्छा दिल्या. मुख्याध्यापिका महानंदा शिंदे यांनीही त्याचे कौतुक करत पुढील वाटचालीस प्रोत्साहन दिले. आदित्यला या यशासाठी विद्यालयाचे क्रीडा शिक्षक ज्ञानेश्वर शिंदे आणि संगीत शिक्षक प्रकाश बोरगावकर यांचे मोलाचे मार्गदर्शन लाभले. त्याच्या या यशाबद्दल सर्व स्तरातून कौतुक होत आहे.