अंबाजोगाईत जुन्या वादातून तरुणावर कुऱ्हाडीने जीवघेणा हल्ला
Updated: जानेवारी 1, 2026
‘विवेक सिंधु' WhatsApp Channel जॉईन करा
Join Channelआरोपी अटकेत, दोन दिवसांची पोलीस कोठडी
अंबाजोगाई: तालुक्यातील अंबासाखर कारखाना परिसरात २९ डिसेंबर रोजी सकाळी साडेसात वाजता जुन्या भांडणाची कुरापत काढून एका तरुणावर कुऱ्हाडीने जीवघेणा हल्ला करण्यात आला. समीर सिकंदर पठाण असे आरोपीचे नाव असून त्याने धनराज ओमप्रकाश कांबळे याच्या डोक्यात कुऱ्हाडीने वार करून त्याला जिवे मारण्याचा प्रयत्न केला. या हल्ल्यात धनराज गंभीर जखमी झाला असून त्याला वाचवण्यासाठी आलेल्या अक्षय परमेश्वर कणसे या मध्यस्थालाही आरोपीने लोखंडी हातोड्याने मारहाण केली. या प्रकरणी अंबाजोगाई ग्रामीण पोलीस ठाण्यात गुन्हा दाखल करण्यात आला असून आरोपीला अटक करण्यात आली आहे.
मिळालेल्या माहितीनुसार, आंबा साखर कारखाना परिसरात गणेश गाळुंके यांच्या चप्पलाच्या दुकानासमोर ही हिंसक घटना घडली. आरोपी समीर पठाण आणि धनराज कांबळे यांच्यात जुना वाद होता. याच वादाचे रूपांतर शुक्रवारी सकाळी हाणामारीत झाले. आरोपीने संतापून जवळ असलेल्या कुऱ्हाडीने धनराजच्या डोक्यात वार केले, ज्यामुळे तो रक्ताच्या थारोळ्यात कोसळला. सध्या धनराजवर रुग्णालयातील अतिदक्षता विभागात उपचार सुरू असून त्याची प्रकृती चिंताजनक असल्याचे समजते. यावेळी भांडण सोडवण्यासाठी गेलेल्या अक्षय कणसे याच्या डाव्या पायावर आणि मांडीवर आरोपीने लोखंडी हातोड्याने प्रहार करून त्यालाही जखमी केले.
या घटनेनंतर परिसरात खळबळ उडाली असून जखमीचा भाऊ युवराज ओमप्रकाश कांबळे याने दिलेल्या फिर्यादीवरून अंबाजोगाई ग्रामीण पोलिसांनी आरोपी समीर पठाणविरुद्ध गुन्हा नोंदवला आहे. उपविभागीय पोलीस अधिकारी ऋषिकेश शिंदे यांनी घटनेचे गांभीर्य ओळखून स्वतः या प्रकरणाचा तपास हाती घेतला आहे. पोलिसांनी आरोपीला न्यायालयात हजर केले असता, त्याला दोन दिवसांची पोलीस कोठडी सुनावण्यात आली आहे.
Related Posts :
