मृत्यूच्या वळणावर माणुसकीचा ‘रक्षक’: धारूर घाटात विनोद पोखरकरांच्या समयसूचकतेमुळे टळला भीषण अनर्थ
Updated: फेब्रुवारी 21, 2026
‘विवेक सिंधु' WhatsApp Channel जॉईन करा
Join Channelअंबाजोगाई: धारूर घाटातील एका अत्यंत धोकादायक वळणावर ऑइल टँकरमधून झालेल्या तेलगळतीमुळे मृत्यूचा सापळा रचला गेला असताना, अंबाजोगाईचे सामाजिक कार्यकर्ते विनोद पोखरकर यांनी दाखवलेल्या धैर्याने आणि समयसूचकतेने मोठा अनर्थ टळला आहे. भररस्त्यात तेल सांडल्याने वाहने काचेसारखी घसरत असताना, कोणत्याही प्रशासकीय मदतीची वाट न पाहता पोखरकर यांनी स्वतःच्या हाताने माती उपसून रस्त्यावर टाकली आणि शेकडो प्रवाशांचे प्राण वाचवले. हा थरार शनिवारी दुपारी धारूर घाटात पाहायला मिळाला.
मिळालेल्या माहितीनुसार, घाटातील एका कठीण वळणावर टँकरमधून मोठ्या प्रमाणात ऑइल सांडल्याने रस्ता प्रचंड निसरडा झाला होता. मागून येणारी दुचाकी आणि चारचाकी वाहने या तेलकट भागावरून अनियंत्रित होऊन घसरू लागल्याने प्रवाशांमध्ये भीतीचे वातावरण निर्माण झाले होते. काही वाहने एकमेकांवर आदळून किरकोळ अपघातही झाले होते. नेमक्या याच वेळी विनोद पोखरकर आपल्या वाहनाने तिथून जात होते. डोळ्यासमोर एक गाडी घसरताना दिसताच त्यांनी परिस्थितीचे गांभीर्य ओळखले आणि क्षणाचाही विलंब न लावता आपले वाहन बाजूला उभे केले.
घाटात वाहनांची वेगवान वर्दळ आणि समोरून येणाऱ्या गाड्यांचा धोका असूनही, पोखरकर यांनी स्वतःच्या जिवाची पर्वा केली नाही. त्यांनी रस्त्याच्या कडेची माती आपल्या हाताने उपसून ऑइल सांडलेल्या संपूर्ण भागावर पसरवण्यास सुरुवात केली. तब्बल अर्धा तास ते रणरणत्या उन्हात ही धडपड करत होते. केवळ माती टाकून ते थांबले नाहीत, तर येणाऱ्या प्रत्येक वाहनचालकाला मोठ्या आवाजात ओरडून रस्ता निसरडा असल्याची पूर्वसूचना देत होते. त्यांच्या या सतर्कतेमुळे अनेक मोठी वाहने आणि दुचाकी चालक वेळीच सावध झाले.
या घटनेचे प्रत्यक्षदर्शी असलेल्या एका कुटुंबाने सांगितले की, जर पोखरकर यांनी वेळीच माती टाकली नसती आणि ओरडून सावध केले नसते, तर आज अनेक संसार उघड्यावर पडले असते. प्रशासकीय यंत्रणा पोहचण्यापूर्वीच एका व्यक्तीने दाखवलेल्या या ‘माणुसकीच्या भिंती’मुळे मोठी जीवितहानी टळली आहे. घाटात थांबायला जागा नसताना आणि परिस्थिती अत्यंत बिकट असताना विनोद पोखरकर यांनी जे धाडस दाखवले, त्याचे संपूर्ण परिसरातून आणि सोशल मीडियावरून भरभरून कौतुक होत आहे. एका जागरूक नागरिकाने ठरवले तर तो प्रशासनापेक्षाही वेगाने संकटाशी दोन हात करू शकतो, याचेच हे उत्तम उदाहरण ठरले आहे.
Related Posts :
