ज्ञानराधा मल्टिस्टेट घोटाळा: अर्चना कुटे यांना ७ मार्चपर्यंत ईडी कोठडी

Updated: मार्च 6, 2026

By Vivek Sindhu

‘विवेक सिंधु' WhatsApp Channel जॉईन करा

मुंबई: बीड येथील ज्ञानराधा मल्टिस्टेट को-ऑपरेटिव्ह क्रेडिट सोसायटीमधील करोडो रुपयांच्या कथित आर्थिक गैरव्यवहार प्रकरणी अंमलबजावणी संचालनालयाने (ईडी) मोठी कारवाई करत अर्चना सुरेश कुटे यांना अटक केली आहे. मुंबईतील विशेष पीएमएलए न्यायालयाने त्यांना ७ मार्चपर्यंत ईडी कोठडी सुनावली असून, गुंतवणूकदारांची फसवणूक आणि मनी लाँड्रिंगच्या गंभीर आरोपाखाली ही कारवाई करण्यात आली आहे. ईडीच्या मुंबई विभागीय कार्यालयाने २ मार्च रोजी प्रिव्हेंशन ऑफ मनी लाँड्रिंग ॲक्ट (पीएमएलए) २००२ अंतर्गत ही अटक केली असून, त्यानंतर त्यांना न्यायालयात हजर करण्यात आले होते.

जुलै २०२४ मध्ये महाराष्ट्रातील विविध पोलीस ठाण्यांत दाखल झालेल्या एफआयआरच्या आधारे ईडीने या प्रकरणाचा तपास सुरू केला होता. सुरेश कुटे आणि त्यांच्या सहकाऱ्यांनी ज्ञानराधा मल्टिस्टेटच्या माध्यमातून गुंतवणूकदारांना आकर्षित करण्यासाठी वार्षिक १२ ते १४ टक्के परताव्याचे आमिष दाखवले होते. या आकर्षक योजनांना भुलून हजारो लोकांनी आपल्या आयुष्यभराची पुंजी या सोसायटीत गुंतवली. मात्र, मुदत संपल्यानंतरही गुंतवणूकदारांना त्यांच्या ठेवी परत मिळाल्या नाहीत, ज्यामुळे सामान्य जनतेचे मोठे आर्थिक नुकसान झाले आहे.

ईडीच्या तपासात धक्कादायक माहिती समोर आली असून, सोसायटीतील सुमारे २४६७ कोटी रुपये कर्जाच्या नावाखाली कुटे ग्रुपच्या विविध कंपन्यांकडे वळवण्यात आले होते. विशेष म्हणजे, ही अवाढव्य रक्कम कोणत्याही अधिकृत कागदपत्रांशिवाय आणि कोणत्याही प्रकारची सुरक्षा (सेक्युरिटी) न ठेवता हस्तांतरित करण्यात आली होती. या कंपन्यांचे संपूर्ण नियंत्रण सुरेश कुटे आणि अर्चना कुटे यांच्याकडेच असल्याचे निष्पन्न झाले आहे. या निधीचा वापर वैयक्तिक फायद्यासाठी आणि इतर व्यवसायांमध्ये गुंतवणुकीसाठी केल्याचा संशय तपास यंत्रणेने व्यक्त केला आहे. या प्रकरणात अर्चना यांचे पती सुरेश कुटे यांना यापूर्वीच अटक करण्यात आली असून, आता अर्चना कुटे यांच्या अटकेमुळे या घोटाळ्याचे धागेदोरे अधिक स्पष्ट होण्याची शक्यता वर्तवण्यात येत आहे.