अंबाजोगाई पालिकेच्या अर्थसंकल्पीय बैठकीचे फेसबुकवर ‘लाईव्ह’ प्रक्षेपण
Updated: फेब्रुवारी 27, 2026
पारदर्शक कारभाराचे नागरिकांकडून जोरदार स्वागत
‘विवेक सिंधु' WhatsApp Channel जॉईन करा
Join Channelपारदर्शक कारभाराचे नागरिकांकडून जोरदार स्वागत
अंबाजोगाई: अंबाजोगाई नगर परिषदेची विशेष अर्थसंकल्पीय बैठक आज पालिकेच्या सभागृहात उत्साहात पार पडली. या बैठकीचे सर्वात मोठे वैशिष्ट्य म्हणजे स्थानिक प्रशासनाने इतिहासात प्रथमच बैठकीचे फेसबुकवर थेट प्रक्षेपण केले. नगराध्यक्ष नंदकिशोर मुंदडा, उपनगराध्यक्ष दिनेश भराडीया आणि मुख्याधिकारी प्रियांका टोंगे यांच्या प्रमुख उपस्थितीत झालेल्या या बैठकीत शहराच्या विकासाचा लेखाजोखा मांडण्यात आला. लोकशाहीत पारदर्शकता आणण्याच्या या ऐतिहासिक पावलाचे शहरातील जनतेने उत्स्फूर्त स्वागत केले आहे.
या विशेष बैठकीला शहर परिवर्तन आघाडी आणि लोकविकास महाआघाडीचे सर्व नगरसेवक आणि नगरसेविका उपस्थित होत्या. बैठकीच्या सुरुवातीला आगामी आर्थिक वर्षाचा अर्थसंकल्प सादर करण्यात आला. यावेळी शहराच्या पायाभूत सुविधा, पाणीपुरवठा, रस्ते आणि स्वच्छता या विषयांवर सविस्तर चर्चा करण्यात आली. या चर्चेत राजकिशोर मोदी, बबनराव लोमटे, संजय गंभिरे, ॲड. विकास काकडे, गणेश देशमुख, नजीर पठाण, महेश कदम यांनी भाग घेत महत्वपूर्ण सूचना मांडल्या. नगराध्यक्ष नंदकिशोर मुंदडा यांनी सर्व सदस्यांना विश्वासात घेऊन शहराचा विकास साधला जाईल, असे आश्वासन दिले. नगर परिषदेचे उत्पन्न वाढवण्यासाठी करावयाच्या उपाययोजना आणि शासन स्तरावरून येणाऱ्या अनुदानाचा विनियोग यावरही या बैठकीत मंथन झाले.
दरम्यान, नगराध्यक्ष नंदकिशोर मुंदडा यांनी घेतलेला लाईव्ह प्रक्षेपणाचा निर्णय क्रांतिकारी ठरला असून, हजारो अंबाजोगाईकरांनी घरबसल्या आपल्या लोकप्रतिनिधींचे कामकाज पाहिले. शहर विकासाचे निर्णय कसे घेतले जातात, निधीची तरतूद कशी केली जाते आणि चर्चेचा स्तर कसा असतो, याचा प्रत्यक्ष अनुभव पहिल्यांदाच सर्वसामान्यांना घेता आला. नेहमीच बंद दाराआड चालणारा पालिकेचा कारभार आज प्रत्यक्ष पाहण्यास मिळाल्याने नागरिकांमध्ये समाधानाचे वातावरण आहे. जनतेचा पैसा कुठे खर्च होतो आणि आपले प्रश्न सभागृहात कसे मांडले जातात, हे पाहिल्यामुळे प्रशासनावरील विश्वास वाढण्यास मदत झाली आहे. तांत्रिक सोयीचा वापर करून कारभारात आणलेली ही सुसूत्रता इतर नगरपालिकांसाठीही मार्गदर्शक ठरणारी आहे. फेसबुकवरील या प्रक्षेपणामुळे सर्वसामान्यांनाही धोरणात्मक निर्णयांमध्ये अप्रत्यक्षपणे सहभागी होता आले.
या पारदर्शक प्रक्रियेमुळे शहराच्या भविष्यातील विकासकामांना नवी गती मिळणार असून, नागरिकांच्या समस्यांना थेट वाचा फुटण्यास मदत होईल, असा विश्वास व्यक्त केला जात आहे. प्रशासनाने यापुढेही महत्त्वाच्या बैठकांचे असेच प्रक्षेपण सुरू ठेवावे, जेणेकरून जबाबदारी आणि उत्तरदायित्व अधिक स्पष्ट होईल, अशी मागणी आता जोर धरत आहे.
Related Posts :
