‘झेनिथ–६’ क्रीडा महोत्सव: पोदार इंटरनॅशनल स्कूलचा वार्षिक क्रीडादिन उत्साहात संपन्न

*‘झेनिथ–६’ क्रीडा महोत्सव: पोदार इंटरनॅशनल स्कूलचा वार्षिक क्रीडादिन उत्साहात संपन्न*

अंबाजोगाई: येथील पोदार इंटरनॅशनल स्कूलच्या प्रांगणात १३ फेब्रुवारी रोजी ‘झेनिथ-६’ या वार्षिक क्रीडा महोत्सवाचे अत्यंत दिमाखदार आणि उत्साही वातावरणात आयोजन करण्यात आले होते. विद्यार्थ्यांच्या शारीरिक व मानसिक विकासाला क्रीडेच्या माध्यमातून चालना देण्यासाठी आयोजित या सोहळ्यात खेळाडूंच्या जोशपूर्ण सहभागाने आणि पालकांच्या उत्स्फूर्त उपस्थितीने संपूर्ण परिसर भारून गेला होता. कार्यक्रमाची सुरुवात मान्यवरांच्या हस्ते ध्वजारोहण करून आणि राष्ट्रध्वजाला मानवंदना देत शालेय गीताच्या सादरीकरणाने झाली. त्यानंतर विद्यार्थ्यांनी मशाल प्रज्वलन आणि शिस्तबद्ध मार्च पास्टच्या माध्यमातून आपल्यातील एकता आणि क्रीडाभावनेचे दर्शन घडविले.

या सोहळ्याला प्रमुख पाहुणे म्हणून तालुका क्रीडा अधिकारी सतीश राठोड आणि शहर पोलीस ठाण्याचे पोलीस निरीक्षक शरद जोगदंड उपस्थित होते. तसेच विशेष अतिथी म्हणून विनायक कन्स्ट्रक्शनचे चेअरमन चंद्रकांत गित्ते यांनी विद्यार्थ्यांना मार्गदर्शन करत खेळाचे महत्त्व पटवून दिले. शाळेचे प्राचार्य किर्ती कुमार देशमुख यांनी आपल्या भाषणात क्रीडा ही केवळ स्पर्धा नसून ती विद्यार्थ्यांच्या सर्वांगीण विकासाचा पाया असल्याचे अधोरेखित केले.

क्रीडा महोत्सवात इयत्ता पहिली ते आठवीच्या विद्यार्थ्यांसाठी विविध स्पर्धांचे आयोजन करण्यात आले होते. यामध्ये ग्रॅब द चेअर, कलेक्टिंग बॉल्स, झिगझॅग रनिंग, पिरॅमिड रेस, रिले रेस आणि रिंग रन यांसारख्या अंतिम स्पर्धांमध्ये विद्यार्थ्यांनी आपल्या चपळाईचे आणि कौशल्याचे उत्कृष्ट प्रदर्शन केले. विशेषतः इयत्ता तिसरी ते पाचवीच्या विद्यार्थ्यांनी सादर केलेले रिबन ड्रिल, बॉल ड्रिल आणि रिंग ड्रिल उपस्थितांच्या आकर्षणाचे केंद्र ठरले. यासोबतच योगासने, मार्शल आर्ट आणि पारंपारिक लेझीम सादरीकरणाने सोहळ्याची शोभा अधिकच वाढविली.

कार्यक्रमाचे एक खास आकर्षण म्हणजे पालकांसाठी आयोजित करण्यात आलेल्या विशेष स्पर्धा होत्या, ज्यामध्ये पालकांनीही मोठ्या उत्साहात सहभाग नोंदविला. स्पर्धेच्या शेवटी ‘चॅम्पियन हाऊस’ची घोषणा करून यशस्वी खेळाडू आणि संघांचा गौरव करण्यात आला. ‘एकत्र येऊ, जिंकू नेहमीच’ हा सकारात्मक संदेश देत राष्ट्रगीताने या क्रीडा महोत्सवाची सांगता झाली.

Related Posts :

बीडमध्ये उपमुख्यमंत्री सुनेत्रा पवार यांच्या हस्ते होणार कृषी प्रदर्शनाचे उद्घाटन

बीडमधील महापशुधन एक्स्पो म्हणजे केवळ प्रपोगंडा

राज्यात ग्रामपंचायत निवडणुकांचे बिगुल वाजले; २० फेब्रुवारीपासून प्रभाग रचनेला सुरुवात

भरचौकातून तरुणाचे अपहरण करत तलवारीच्या धाकाने लुटले; अंबाजोगाईतील खळबळजनक घटना

अंबाजोगाई बसस्थानकावर प्रवाशांच्या गर्दीत डल्ला; महिलेचे सोन्याचे दागिने लंपास

अंबाजोगाईत गॅरेज चालकाचा प्रामाणिकपणा: ८० हजारांची रोकड व दागिन्यांची पर्स मालकास परत