राज्यात ग्रामपंचायत निवडणुकांचे बिगुल वाजले; २० फेब्रुवारीपासून प्रभाग रचनेला सुरुवात
Updated: फेब्रुवारी 17, 2026
‘विवेक सिंधु' WhatsApp Channel जॉईन करा
Join Channelमुंबई: महाराष्ट्रातील ग्रामीण राजकारणाचा कणा असलेल्या ग्रामपंचायतींच्या आगामी निवडणुकांसाठी राज्य शासनाने आज अधिकृत घोषणा केली असून प्रभाग रचनेचा सविस्तर कार्यक्रम जाहीर केला आहे. जानेवारी ते डिसेंबर २०२६ या कालावधीत मुदत संपणाऱ्या आणि नव्याने स्थापन झालेल्या ग्रामपंचायतींच्या सार्वत्रिक निवडणुकांसाठी ही प्रक्रिया राबवली जाणार आहे. या निर्णयानुसार येत्या २० फेब्रुवारी २०२६ पासून प्रत्यक्ष कामाला सुरुवात होणार असून संपूर्ण राज्याचे लक्ष आता गावपातळीवरील या राजकीय हालचालींकडे लागले आहे. ग्रामविकास विभागाच्या सहसचिव वर्षा भरोसे यांनी यासंदर्भातील लेखी आदेश जारी केले असून जिल्हाधिकारी, उपविभागीय अधिकारी आणि तहसीलदार यांच्यावर या प्रक्रियेची महत्त्वाची जबाबदारी सोपवण्यात आली आहे.
प्रशासनाने आखलेल्या नियोजनानुसार प्रभाग रचनेचे काम तीन मुख्य टप्प्यांत पूर्ण केले जाणार आहे. पहिल्या टप्प्यात आधुनिक तंत्रज्ञानाचा वापर करून तहसीलदार ‘गुगल अर्थ’च्या साहाय्याने २० फेब्रुवारीपर्यंत गावांचे नकाशे अंतिम करतील. त्यानंतर दुसऱ्या टप्प्यात स्थानिक स्तरावर तलाठी आणि ग्रामसेवक प्रत्यक्ष जमिनीवर जाऊन सीमा निश्चितीची पडताळणी २७ फेब्रुवारीपर्यंत पूर्ण करतील. तिसऱ्या आणि अंतिम टप्प्यात जिल्हाधिकाऱ्यांनी तपासलेले प्रस्ताव राज्य निवडणूक आयोगाकडे पाठवले जातील आणि २३ मार्च २०२६ पर्यंत त्यांना अंतिम मान्यता दिली जाईल.
निवडणूक प्रक्रियेत पारदर्शकता राखण्यासाठी नागरिकांच्या हरकती आणि सूचनांनाही विशेष महत्त्व देण्यात आले आहे. ७ एप्रिल २०२६ रोजी प्रभाग रचनेचा मसुदा अधिकृतरीत्या प्रसिद्ध केला जाणार असून ७ ते १३ एप्रिल या काळात नागरिकांना आपल्या हरकती नोंदवता येतील. प्राप्त झालेल्या तक्रारींवर २१ एप्रिलपर्यंत उपविभागीय अधिकाऱ्यांकडे सुनावणी पार पडेल. सर्व कायदेशीर प्रक्रिया पूर्ण झाल्यानंतर २८ एप्रिल रोजी जिल्हाधिकारी अंतिम आराखडा निवडणूक आयोगाकडे सादर करतील आणि ४ मे २०२६ रोजी राज्याच्या ग्रामीण भागातील नव्या प्रभाग रचनेची अधिकृत घोषणा केली जाईल. या घोषणेमुळे ग्रामीण भागात राजकीय मोर्चेबांधणीला आता खऱ्या अर्थाने वेग येणार आहे.
Related Posts :
