संतोष देशमुख हत्या प्रकरणाचा नवा अध्याय : २० कोटींच्या कथित ऑफरचा व्हिडिओ व्हायरल
Updated: नोव्हेंबर 10, 2025
संतोष देशमुख हत्या प्रकरणाचा नवा अध्याय : २० कोटींच्या कथित ऑफरचा व्हिडिओ व्हायरल
‘विवेक सिंधु' WhatsApp Channel जॉईन करा
Join Channelबीड : केज तालुक्यातील मस्साजोग येथील सरपंच संतोष देशमुख यांच्या निर्घृण हत्येला एक वर्ष उलटलं असलं तरी हे प्रकरण पुन्हा एकदा चर्चेत आलं आहे. कारण, सोशल मीडियावर संतोष देशमुख यांचे भाऊ धनंजय देशमुख यांना कथितरित्या २० कोटी रुपयांची ऑफर दिल्याचा व्हिडिओ व्हायरल झाला आहे.
या व्हिडिओमध्ये ही ऑफर धनंजय मुंडे आणि वाल्मिक कराड यांचा मुलगा सुशील कराड यांच्या माध्यमातून देण्यात आल्याचा दावा करण्यात आला आहे. चर्चेदरम्यान शासकीय अंगरक्षक संतोष जाधव उपस्थित असल्याचंही त्यात नमूद आहे. मात्र या व्हिडिओची सत्यता अद्याप तपासात असून, कोणत्याही वृत्तसंस्थेने त्याची अधिकृत पुष्टी केलेली नाही.
हत्येने हादरला होता राज्यभरातील राजकारण
९ डिसेंबर २०२४ रोजी संतोष देशमुख यांचे अपहरण करून त्यांच्यावर अमानुष अत्याचार करण्यात आले आणि त्यानंतर त्यांची हत्या करण्यात आली. मृतदेह गावाजवळ सापडला होता. तपासादरम्यान धनंजय मुंडे यांचे निकटचे सहकारी वाल्मिक कराड यांच्या खंडणी रॅकेटचा या प्रकरणाशी संबंध असल्याचं समोर आलं. या प्रकरणात अनेकांना अटक झाली असून प्रमुख आरोपी वाल्मिक कराड तुरुंगात आहे. दुसरा आरोपी कृष्णा आंधळे अद्याप फरार आहे. या गुन्ह्यात मकोका कायद्यानुसार कारवाई करण्यात आली आहे.
राज्य सरकारने या हत्येचा तपास जलदगतीने व्हावा म्हणून विशेष तपास पथक (SIT) स्थापन केले होते. SIT च्या तपासातून आरोपींनी केलेल्या अत्याचारांचे व्हिडिओ आणि छायाचित्रे समोर आली होती. पोलिसांनी फक्त ८० दिवसांत दोषारोपपत्र दाखल करत तत्परता दाखवली. या घटनेने केवळ बीडचं नव्हे तर राज्याचं राजकारण हलवलं.
धनंजय मुंडेंवरील दबाव आणि राजीनामा
या हत्येनंतर सर्वाधिक राजकीय दबाव तत्कालीन मंत्री धनंजय मुंडे यांच्यावर आला. तपासात त्यांचं नाव थेट आलं नसले तरी त्यांच्या निकटवर्तीय वाल्मिक कराडवर गुन्हा दाखल झाल्याने त्यांच्यावर गंभीर आरोप झाले. सुरुवातीला मुंडेंनी या सर्व आरोपांना फेटाळलं. मात्र हत्येतील अत्याचारांचे फोटो आणि व्हिडिओ सार्वजनिक झाल्यानंतर राज्यभर संतापाची लाट उसळली. वाढत्या दबावामुळे अखेर धनंजय मुंडेंना मंत्रीपदाचा राजीनामा द्यावा लागला.
२० कोटींच्या कथित ऑफरने पेटली नवी चर्चा
आता व्हायरल झालेल्या नव्या व्हिडिओमुळे प्रकरणाला नवं वळण मिळालं आहे. व्हिडिओतील दाव्यांमुळे बीड जिल्हा आणि राज्यभरात चर्चा सुरू झाली आहे. तपास यंत्रणा या व्हिडिओची सत्यता आणि त्यामागचे राजकीय संबंध तपासणार आहेत. आधीच मकोकाखालील गंभीर आरोप असलेल्या आरोपींवर तपास सुरू असताना, या नव्या खुलाशामुळे हत्येमागील राजकीय आणि आर्थिक साखळी पुन्हा चर्चेत आली आहे.
म्हणूनच संतोष देशमुख हत्या प्रकरण अद्याप संपलेलं नाही. उलट त्याचा नवा, अधिक गुंतागुंतीचा अध्याय आता सुरू झाल्याची चर्चा बीड जिल्ह्यात रंगत आहे.
Related Posts :
