संतोष देशमुख हत्या प्रकरण: मुख्य आरोपी वाल्मिक कराडने नाकारले आरोप, न्यायालयात दोषारोप निश्चिती
Updated: डिसेंबर 23, 2025
मुख्य आरोपी वाल्मिक कराडने नाकारले आरोप, न्यायालयात दोषारोप निश्चिती
‘विवेक सिंधु' WhatsApp Channel जॉईन करा
Join Channelबीड: केज तालुक्यातील मस्साजोगचे सरपंच संतोष देशमुख यांच्या निर्घृण हत्या प्रकरणाने आज न्यायालयात महत्त्वाचे वळण घेतले. बीड येथील जिल्हा व विशेष सत्र न्यायालयात झालेल्या २३ व्या सुनावणीत मुख्य आरोपी वाल्मिक कराडसह सर्व आरोपींवर दोषारोप निश्चित करण्यात आले आहेत. न्यायाधीशांनी विचारलेल्या प्रश्नावर वाल्मिक कराडने प्रथमच मौन सोडत आपल्यावरील सर्व आरोप फेटाळून लावले आहेत.
या प्रकरणाची पार्श्वभूमी अशी की, ९ डिसेंबर २०२४ रोजी केज तालुक्यातील टाकळी शिवारात सरपंच संतोष देशमुख यांची क्रूरपणे हत्या करण्यात आली होती. खंडणी वसुलीत अडथळा निर्माण केल्याच्या रागातून आरोपींनी हे कृत्य केल्याचा प्राथमिक निष्कर्ष आहे. या प्रकरणात वाल्मिक कराड, सुदर्शन घुले, जयराम चाटे, श्रीकृष्ण आंधळे, प्रतीक घुले, सुधीर सांगळे, महेश केदार आणि विष्णू चाटे या आरोपींचा समावेश आहे. आरोपींनी संतोष देशमुख यांना मारहाण करतानाचे १५ व्हिडिओ आणि ८ फोटो काढले होते, जे तपासात महत्त्वाचे पुरावे ठरले आहेत.
आजच्या सुनावणीदरम्यान विशेष सरकारी वकील उज्वल निकम यांनी न्यायालयात जोरदार युक्तिवाद केला. न्यायालयाने सर्व आरोपींना त्यांच्यावरील गुन्ह्यांचे स्वरूप सविस्तर वाचून दाखवले आणि त्यांना हे आरोप मान्य आहेत का, अशी विचारणा केली. त्यावर वाल्मिक कराडने स्वतःहून पुढे येत हे आरोप मान्य नसल्याचे न्यायालयाला सांगितले. उज्वल निकम यांनी प्रसारमाध्यमांशी बोलताना सांगितले की, आरोपींच्या वकिलांकडून खटला लांबवण्याचा प्रयत्न होत आहे, मात्र न्यायालयीन प्रक्रिया गतिमान करण्यासाठी प्रयत्न सुरू आहेत.
या प्रकरणाचा तपास केज पोलीस ठाण्यांतर्गत करण्यात आला असून पोलिसांनी १८०० पानांचे दोषारोपपत्र न्यायालयात सादर केले आहे. या प्रकरणाची पुढील सुनावणी आता ८ जानेवारी रोजी निश्चित करण्यात आली असून, त्या दिवशी प्रत्यक्ष पुराव्यांचे आणि साक्षीदारांचे काम सुरू होण्याची शक्यता आहे.
Related Posts :
