केज – एका ३० वर्षीय शेतकऱ्याने राहत्या घरात गळफास घेऊन आत्महत्या केल्याची घटना साबला (ता. केज) येथे शनिवारी (दि. २६) दुपारी २ वाजेच्या दरम्यान उघडकीस आली. अजय अशोक काकडे असे आत्महत्या केलेल्या शेतकऱ्याचे नाव असून आत्महत्या करण्यामागचे कारण स्पष्ट झाले नव्हते.
साबला येथील अजय अशोक काकडे (वय ३०) हा तरुण शेती करीत होता. त्याचे वडील हे सेवानिवृत्त सैनिक असून पत्नी ही अंगणवाडी सेविका आहेत. शनिवारी दुपारी घरी कोणी नसताना अजय काकडे यांनी आपल्या राहत्या घरात गळफास लावून आत्महत्या केली. या घटनेची माहिती मिळताच केज ठाण्याचे पोलीस निरीक्षक स्वप्नील उनवणे यांच्या आदेशावरून सहाय्यक फौजदार प्रल्हाद चव्हाण, जमादार फुलचंद सानप यांनी घटनास्थळी भेट देऊन पंचनामा करीत मृतदेह उत्तरीय तपासणीसाठी पाठवून दिला. उपजिल्हा रुग्णालयात शवविच्छेदन झाल्यानंतर रात्री अंत्यसंस्कार करण्यात आले. तर आत्महत्या करण्यामागचे कारण स्पष्ट झालेले नसून या घटनेची पोलिसात नोंद झाली नव्हती.
दरम्यान, या तरुणास दीड ते दोन वर्षाचा लहान मुलगा असून तो एकुलता एक मुलगा होता. या घटनेबद्दल गावात हळहळ व्यक्त केली जात आहे.