बीडमधील महापशुधन एक्स्पो म्हणजे केवळ प्रपोगंडा
Updated: फेब्रुवारी 17, 2026
‘विवेक सिंधु' WhatsApp Channel जॉईन करा
Join Channelकरुणा शर्मा यांची पंकजा मुंडे यांच्यावर बोचरी टीका
बीड: भाजप नेत्या आणि मंत्री पंकजा मुंडे यांच्या पुढाकाराने परळीत आयोजित करण्यात आलेल्या महापशुधन एक्स्पोवर करुणा शर्मा यांनी अत्यंत तीव्र शब्दांत टीका केली असून या आयोजनाला केवळ प्रसिद्धीचा स्टंट म्हटले आहे. या प्रदर्शनासाठी सरकारी तिजोरीतून कोट्यवधी रुपयांची उधळण करण्यात आली असली तरी प्रत्यक्षात बीडमधील जनावरांची अवस्था दयनीय असल्याचा आरोप शर्मा यांनी केला आहे. मुख्यमंत्री देवेंद्र फडणवीस यांच्यासह अनेक दिग्गज नेत्यांनी या सोहळ्याला हजेरी लावली होती मात्र या भव्यतेच्या मागे जनतेच्या पैशांचा अपव्यय झाल्याचा दावा त्यांनी यावेळी केला.
शर्मा यांच्या दाव्यानुसार या एक्स्पोच्या केवळ मंडपासाठी तीन कोटी रुपये खर्च करण्यात आले आहेत. पशूंसाठी ५० कोटी रुपये देणार असल्याचे जाहीर करण्यासाठी तब्बल ५ कोटी रुपये केवळ जाहिरात आणि गाण्यांवर खर्च झाले आहेत. विशेषतः गायक आनंद शिंदे यांना बोलावून पंकजा मुंडे यांच्यावर गाणी गाण्यासाठी कोट्यवधी रुपये देण्यात आले असा खळबळजनक आरोप त्यांनी केला आहे. सत्तेत असलेले लोक सामान्य जनतेचा पैसा अशा प्रकारे उधळत असताना बीडमधील जनावरांना मात्र कचरा खाऊन आणि नालीतील पाणी पिऊन जगावे लागत असल्याची दाहक वास्तवता त्यांनी मांडली आहे.
शेतकऱ्यांच्या प्रश्नावरूनही त्यांनी सरकारला धारेवर धरले असून अतिवृष्टीमुळे झालेल्या नुकसानीची थट्टा केली जात असल्याचे म्हटले आहे. सरकारने हेक्टरी २५ हजार रुपये मदत देण्याचे आश्वासन दिले होते परंतु प्रत्यक्षात शेतकऱ्यांच्या पदरात केवळ दोन हजार रुपये पडले आहेत. या पार्श्वभूमीवर पंकजा मुंडे यांना टोला लगावताना शर्मा यांनी ‘पंकजाताई बाग नासावते रे बीजेपीच्या कमळाचा’ अशा आशयाचे उपहासात्मक गाणे म्हणत त्यांचा निषेध केला. दिवंगत गोपीनाथ मुंडे यांनी ज्याप्रमाणे जात-पात न बघता गोरगरीब शेतकऱ्यांसाठी काम केले होते त्याचप्रमाणे आपण लोकांच्या हितासाठी लढणार असल्याचा शब्द त्यांनी बीडवासियांना दिला आहे.
Related Posts :
