व्याजासहीत पैसे भरले नाहीतर फासावर लटकावण्याची दिली धमकी

अंबाजोगाई : शहरातील हनुमान नगर येथे राहणाऱ्या ओंकार माने (वय 22) या तरुणाला व्याजाच्या पैशांसाठी अपहरण करून अमानुष मारहाण करण्यात आली. सदर घटना 14 मार्च रोजी रात्री घडली असून, याबाबत अंबाजोगाई शहर पोलीस ठाण्यात सात जणांवर गुन्हा दाखल करण्यात आला आहे.

ओंकार माने याच्या फिर्यादीनुसार, त्याने मित्राकडून वीस हजार रुपये उसने घेतले होते. हे पैसे परत करण्यासाठी रक्कम शिल्लक नसल्याची अडचण त्याने अनिकेत औताडे यास बोलून दाखवली. तेंव्हा अनिकेतने माझा भाऊ जयपाल उर्फ महादू औताडे हा व्याजाने पैसे देतो, तू तुझ्यासाठी २० हजार आणि माझ्यासाठी ५० हजार अशी रक्कम घे, मी माझी रक्कम आणि व्याज फेडतो असे ओंकारला सांगितले. त्याच्यावर विश्वास ठेऊन ओंकारने महादू कडून याच्याकडून ७० हजार रुपये व्याजाने घेतले. मात्र, सात टक्के दराने घेतलेल्या या कर्जावर सतत स्वतःचे आणि अनिकेतचे व्याज भरावे लागत असल्याने ओंकार आर्थिक अडचणीत सापडला. यापुढे तुझे पैसे भरणे शक्य नसल्याचे त्याने अनिकेत याला सांगितले असता, त्याने आपल्या साथीदारांसह ओंकारला धमकावत जबरदस्तीने कारमधून उचलून नेले. त्यानंतर ओंकारला सेलू आंबा येथील एका ढाब्याच्या मागील शेतात नेण्यात आले. तेथे महादु औताडे व त्याच्या साथीदारांनी लोखंडी रॉड, केबल वायर आणि फायबर पाईपने ओंकारला बेदम मारहाण केली. तसेच, "व्याजाचे पैसे भर नाहीतर तुला फासावर लटकवू" अशी धमकी दिली. यावेळी, एका स्थानिक व्यक्तीने हस्तक्षेप करण्याचा प्रयत्न केला असता, आरोपींनी त्यालाही धमकावले.

दरम्यान, ओंकारच्या मित्राने घटनेची माहिती अजिंक्य कदम, गोविंद हाके, आदेश पटाईत यांना दिली. त्यांनी घटनास्थळी जाऊन आरोपींना समजावून सांगत ओंकारला सोडवले. मात्र, नंतर भगवानबाबा चौकात पुन्हा आरोपींनी ओंकार व त्याच्या भावाला, "जर पोलिसात तक्रार दिली तर जिवे मारू व अ‍ॅट्रॉसिटीचा गुन्हा दाखल करू" अशी धमकी दिली. सदर फिर्यादीवरून  अनिकेत औताडे, जयपाल औताडे, धीरज बनसोडे, नूर, बापू इंगळे, अभिमन्यू औताडे व सिद्दीक या सात जणांविरोधात अंबाजोगाई शहर ठाण्यात गुन्हा दाखल करण्यात आला आहे. पोलिसांनी पुढील तपास सुरू केला आहे.