परळी : परळी-सिरसाळा रस्त्यावर शुक्रवारी (दि. १) रात्री साडेअकराच्या सुमारास कार व ट्रक यांच्यात भीषण अपघात झाला. या अपघातात ट्रक मालक सय्यद मगदुम सय्यद जफर (वय ४५, रा. पेठ मोहल्ला, परळी वैजनाथ) यांचा जागीच मृत्यू झाला.
मिळालेल्या माहितीनुसार, सय्यद मगदुम हे आपल्या ट्रकचा पंक्चर झालेला टायर बदलण्यासाठी सिरसाळा जवळील रस्त्याच्या कडेला उभे होते. दरम्यान, भरधाव वेगाने येणाऱ्या स्विफ्ट डिझायर कारने त्यांना जोरदार धडक दिली. धडक एवढी जबरदस्त होती की, घटनास्थळीच त्यांचा मृत्यू झाला.
स्थानिक नागरिकांनी तात्काळ मदतकार्य करत त्यांना परळी येथील उपजिल्हा रुग्णालयात दाखल केले, मात्र डॉक्टरांनी त्यांना मृत घोषित केले. घटनेची माहिती मिळताच रुग्णालयात नातेवाईक, परिचित आणि नागरिकांची मोठी गर्दी झाली होती.
दरम्यान, अपघात घडवणारी कार पोलिसांनी ताब्यात घेतली असून पुढील तपास सिरसाळा पोलीस करत आहेत. या घटनेमुळे परळीत हळहळ व्यक्त केली जात आहे.
