अश्लील व्हिडिओ पाहून १५ वर्षांच्या मुलाने दोन वर्षांच्या चिमुरडीवर केला अत्याचार; अंबाजोगाई तालुक्यातील घृणास्पद घटना
Updated: मार्च 27, 2026
‘विवेक सिंधु' WhatsApp Channel जॉईन करा
Join Channelअंबाजोगाई: अंबाजोगाई ग्रामीण पोलीस ठाण्याच्या हद्दीत माणुसकीला काळीमा फासणारी एक संतापजनक घटना समोर आली आहे. अवघ्या दोन वर्षे पाच महिने वयाच्या चिमुरडीवर तिच्याच १५ वर्षीय नातेवाईकाने लैंगिक अत्याचार केल्याचे पोलीस तपासात निष्पन्न झाले आहे. धक्कादायक बाब म्हणजे मोबाईलवर अश्लील व्हिडिओ पाहून आरोपीने हे कृत्य केले असून, पीडितेचा मृत्यू झाल्यानंतर शवविच्छेदन अहवालातून हा प्रकार उघड झाला आहे.
अंबाजोगाई तालुक्यातील एका गावातील ही चिमुरडी १७ मार्च २०२६ रोजी घरासमोरील पाण्याच्या हौदात पडून मयत झाली होती. सुरुवातीला हा केवळ अपघात वाटत असल्याने अकस्मात मृत्यूची नोंद करण्यात आली होती. मात्र, अंबाजोगाई येथील स्वामी रामानंद तीर्थ ग्रामीण शासकीय रुग्णालयातील डॉक्टरांनी शवविच्छेदन करताना मुलीवर लैंगिक अत्याचार झाल्याचे निदर्शनास आणून दिले. या प्रकरणाचे गांभीर्य ओळखून पोलीस निरीक्षक मुरलीधर खोकले यांनी पोलीस अधीक्षक नवनीत कांवत, अपर पोलीस अधीक्षक चेतना तिडके आणि सहाय्यक पोलीस अधीक्षक ऋषिकेश शिंदे यांच्या मार्गदर्शनाखाली तातडीने सखोल तपास सुरू केला.
तपासादरम्यान पोलीस निरीक्षक मुरलीधर खोकले आणि त्यांच्या पथकाने अत्यंत गोपनीयरीत्या माहिती गोळा केली. पीडितेच्या मृत्यूनंतर संशयित आरोपी असलेला तिच्या आत्याचा मुलगा (वय १५ वर्षे ५ महिने) हा तीन दिवस जेवला नव्हता आणि सतत रडत होता, अशी माहिती पोलिसांना गुप्त बातमीदारांकडून मिळाली. या संशयावरून पोलिसांनी त्यास विश्वासात घेऊन विचारपूस केली असता त्याने गुन्ह्याची कबुली दिली. पीडितेच्या मृत्यूपूर्वी आठ दिवस अगोदर आरोपीने तिला चॉकलेटचे आमिष दाखवून आपल्या दुचाकीवर बसवून नेले आणि घरात कोणी नसताना मोबाईलवरील अश्लील चित्रफीत पाहून तिच्यावर अत्याचार केले. त्यापूर्वी देखील त्याने तिच्यावर एक वेळेस लैंगिक अत्याचार केल्याची कबुली दिली आहे.
या प्रकरणी अंबाजोगाई ग्रामीण पोलिसांनी आरोपीविरुद्ध भारतीय न्याय संहिता २०२३ चे कलम ६४(१) आणि बालकांचे लैंगिक अपराधांपासून संरक्षण (पोक्सो) अधिनियम २०१२ च्या कलम ४, ६, ८ आणि १२ नुसार गुन्हा दाखल केला आहे. घटनेचे गांभीर्य लक्षात घेत पोलीस निरीक्षक मुरलीधर खोकले यांनी स्वतः सरकारतर्फे फिर्यादी होऊन एका गुंतागुंतीच्या गुन्ह्याचा छडा लावला आहे. या गुन्ह्याचा पुढील तपास पिंक पथकाचे सहाय्यक पोलीस निरीक्षक संतोष जाधवर यांच्याकडे सोपवण्यात आला आहे. या घटनेबद्दल संपूर्ण परिसरात तीव्र संताप व्यक्त केला जात असून पोलीस निरिक्षक खोकले कोणतेही धागेदोरे हाती नसताना कसून तपास करत अत्यंत कमी कालावधीत आरोपी निष्पन्न केल्याबद्दल त्यांचे कौतुक होत आहे.
दरम्यान, या घृणास्पद घटनेच्या पार्श्वभूमीवर पोलीस निरिक्षक मुरलीधर खोकले यांनी आवाहन केले आहे की, पालकांनी आपल्या पाल्यांच्या हातात मोबाईल देताना तो कशासाठी वापरला जात आहे, यावर कडक देखरेख ठेवावी. मोबाईलवरील अश्लील चित्रफिती पाहून किशोरवयीन मुलांमध्ये गुन्हेगारी प्रवृत्ती वाढीस लागत असून, अनेकांचे भविष्यही उद्ध्वस्त होत आहे. पालकांनी आपल्या पाल्यांच्या इंटरनेट वापराची वेळोवेळी तपासणी करावी आणि अभ्यासाव्यतिरिक्त मोबाईलचा अतिवापर टाळण्यासाठी कडक पावले उचलावीत. मुलांशी संवाद साधून त्यांना ‘गुड टच-बॅड टच’ आणि सायबर धोक्यांची जाणीव करून देणे ही आता काळाची गरज बनली आहे. मुलांच्या वर्तनातील बदलांकडे दुर्लक्ष न करता त्यांना योग्य वळण लावण्याचे नैतिक कर्तव्य पालकांनी पार पाडावे, जेणेकरून अशा वाईट घटनांची पुनरावृत्ती टाळता येईल असे खोकले यांनी नमूद केले.
Related Posts :
