धानोरा खु. येथे महिलांची सोयाबीन व ऊस शेतीशाळा संपन्न.

कृषी विभाग व नॅचरल शुगरचा संयुक्त उपक्रम

सुधारित कृषी तंत्रज्ञानाच्या प्रसारासाठी शेतीशाळा हे प्रभावी माध्यम असल्याने तसेच शेती व्यवसायामध्ये महिलांचा मोलाचा वाटा असल्याने कृषी विभागाने महिलांच्या शेतीशाळा घेण्यावर विशेष भर दिलेला आहे. कृषी विषयक नवीन तंत्रज्ञानाची माहिती महिला शेतकऱ्यांपर्यंत पोहोचवण्यासाठी नानाजी देशमुख कृषी संजीवनी प्रकल्प आणि नॅचरल शुगर रांजणी यांच्या संयुक्त विद्यमाने कृषिरत्न बी. बी ठोंबरे, उपविभागीय कृषी अधिकारी गायकवाड यांच्या मार्गदर्शनाखाली सहाय्यक कृषी अधिकारी पंडित काकडे व ऊस विकास अधिकारी शिवप्रसाद येळकर यांनी धानोरा खुर्द येथे महिलांची शेतीशाळा घेऊन मार्गदर्शन केले. काकडे यांनी सोयाबीन पिकामधील रसशोषक कीड पांढरी माशी, खोडमाशी प्रादुर्भावाची निरीक्षणे दाखवून व्यवस्थापनासाठी चिकट सापळे यांचा वापर बाबत विस्तृतपणे माहिती दिली तसेच सरी वरंब्यावर टोकन पद्धतीने सोयाबीन लागवड केल्यामुळे बियाण्याची झालेली बचत बाबत चर्चा केली. सिडिओ शिवप्रसाद येळकर यांनी कमी खर्चातील चिकटसापळे तयार करणे, अळीवर्गीय किडींचा जीवनक्रम सांगून व्यवस्थापनासाठी कामगंध सापळ्यांचे महत्त्व विस्तृतपणे माहिती देऊन कामगंध सापळे लावण्याचे प्रात्यक्षिक प्रशिक्षण करून दाखवले. चुनखडी युक्त शेत जमिनीमधील ऊस पिकामधील पिवळसरपणा विकृती व्यवस्थापन महाराष्ट्र ग्रेड २ मल्टीमायक्रोन्यूट्रिएंटची ३ मिली प्रति १ लिटर पाणी याप्रमाणे फवारणी करणे, ऊस पिकामधील पोक्का बाईंग रोग व्यवस्थापनासाठी प्रोपिकोनाझोल २५ टक्के ईसी १ मिली प्रति १ लिटर पाणी याप्रमाणे फवारणी करावी, जमिनीमधील घातक बुरशींच्या व्यवस्थापनासाठी नॅचरल शुगर उत्पादित फर्मेंटेड ऑरगॅनिक मॅन्युअर (एफओएम) मध्ये ट्रायकोडर्मा मिसळून वापर बाबत विस्तृतपणे माहिती दिली तसेच नॅचरल शुगरच्या माध्यमातून ड्रोनच्या साह्याने अनुदानित फवारणी, नॅचरल ऑरगॅनिक फर्टीलायझर उपलब्धता बाबत माहिती दिली. ग्राम महसूल अधिकारी सुहास चाटे यांनी ॲग्रीस्टॅक बाबत मार्गदर्शन केले. यावेळी तालुका कृषी अधिकारी मुंडे, सरपंच पार्वती पोळ, बेस्ट ऍग्रोचे प्रतिनिधी उबाळे, तुकाराम रेड्डी आणि महिला व पुरुष शेतकरी मोठ्या संख्येने उपस्थित होते.