Breaking News

  • मांजरसुंबा-पाटोदा रोडवर भीषण अपघात; ७ जण जागीच ठार..

अतिवृष्टीमुळे झालेल्या नुकसानीचे पंचनामे 48 तासात पूर्ण करा

लोकप्रतिनिधींच्या जिल्हास्तरीय बैठकीत शासकीय यंत्रणांना निर्देश

बीड : बीड, दि.4:- जिल्ह्यात सर्व ठिकाणी अतिवृष्टी झाल्याने पिकांचे मोठ्या प्रमाणात नुकसान झाले असून 48 तासात पंचनामे पूर्ण करून त्याची माहिती सादर करावी. पिक पंचनाम्यात बरोबरच गावातील जिवीतहानी, मालमत्ता आणि जनावरांच्या नुकसानीचे माहिती देखील सादर करावी असे निर्देश जिल्हाधिकारी कार्यालयाच्या नियोजन सभागृहात खासदार डॉ. प्रीतम मुंडे यांच्या अध्यक्षतेखाली झालेल्या लोकप्रतिनिधींच्या बैठकीत शासकीय यंत्रणांना देण्यात आले. यावेळी जिल्हाधिकारी आस्तिक कुमार पांडेय यांची प्रमुख उपस्थिती होती.

जिल्ह्यात अतिवृष्टीमुळे झालेल्या नुकसानीबाबत करण्यात येत असलेले कार्यवाहीच्या अनुषंगाने आढावा बैठक झाली. यावेळी बैठकीस आमदार लक्ष्मण पवार, आ.प्रकाश सोळंके , आ. संदीप क्षीरसागर, आ. बाळासाहेब आजबे, आ. श्रीमती नमिता मुंदडा, जिल्हा परिषदेच्या अध्यक्षा सविता गोल्हार, मुख्य कार्यकारी अधिकारी अजित कुंभार, निवासी उपजिल्हाधिकारी प्रकाश आघाव पाटील, जिल्हा अधीक्षक कृषी अधिकारी राजेंद्र निकम आणि विविध शासकीय विभागांचे अधिकारी, तहसीलदार, गट विकास अधिकारी, पिक विमा कंपन्यांचे प्रतिनिधी उपस्थित होते. खासदार डॉ.मुंडे म्हणाल्या, अतिवृष्टीमुळे अडचणीतील शेतकऱ्याला प्रधानमंत्री पिकविमा योजनेतून आणि राज्य व केंद्र शासनाच्या वतीने देण्यात येणाऱ्या निधीतून मदत मिळण्यासाठी शासकीय यंत्रणेमार्फत त्वरित कार्यवाही होणे गरजेचे आहे. शेतकऱ्यांना पीक विमा भरपाई रक्कम मिळण्यासाठी अर्ज भरण्यास प्रोत्साहन देणे गरजेचे आहे. शासकीय यंत्रणा यासाठी करीत असलेल्या कार्यवाहीची माहिती लोकप्रतिनिधींना उपलब्ध करून दिली जावी. यासह रब्बी हंगामासाठी शेतकऱ्यांना देखील अडचणी येत आहे. यामुळे शेतकऱ्यांना रेशनवरील धान्य उपलब्ध करून देतानाच जनावरांना चारा उपलब्ध होणे गरजेचे आहे यासाठी उपाययोजना केल्या जाव्यात याकडे प्रशासनाने लक्ष द्यावे असे खासदार श्रीमती मुंडे म्हणाल्या

यावेळी जिल्हाधिकारी श्री.पाण्डेय यांनी अतिवृष्टीच्या अनुषंगाने जिल्ह्यातील शेतकऱ्यांना नुकसान भरपाई देण्यासाठी तातडीने कार्यवाही करण्याबाबत यापूर्वी दिलेल्या आदेशानुसार कार्यवाही केली जावी. तसेच कालमर्यादेत काम पूर्ण करावे यासाठी तहसीलदार , गटविकास अधिकारी आणि तालुका कृषी अधिकारी यांनी सुनिश्चित पद्धतीने काम करावे. कोणतीही अडचण उद्भवल्यास त्याबाबत वरिष्ठ पातळीवरून तातडीने मार्गदर्शन मिळवून मार्ग काढावा राज्य शासनाने अतिवृष्टीतील आपत्तीसाठी 10 हजार कोटी रुपये शेतकऱ्यांना मदतीसाठी तरतूद केली आहे. जिल्ह्यातील परिस्थितीची माहिती वेळेत पूर्ण केल्यास जिल्ह्यातील शेतकऱ्यांना यातील मदत देणे शक्य होणार आहे, असे जिल्हाधिकाऱ्यांनी यावेळी सांगितले. यावेळी बैठकीत गाव पातळीवर नुकसानीचे पंचनामे करणाऱ्या अधिकारी-कर्मचाऱ्यांनी घरे , मालमत्ता आणि जनावरांच्या नुकसानीची देखील माहिती आणि पिक विमाचे भरपाईसाठी अर्ज घेतले जावेत यामुळे ही कामे वेळेत पूर्ण होतील, असे जिल्हाधिकारी श्री.पाण्डेय यांनी सांगितले. आमदार सोळुंके यांनी अतिवृष्टीमुळे शेतकरी अडचणीत सापडला असल्याने आपत्ती मध्ये त्याचे पीक कर्ज व्याजासह माफ व्हावे असे सांगितले. आमदार श्री आजबे यांनी रब्बी हंगामातील पेरणी झाली होती परंतु सदर विमा भरण्यापूर्वी अतिवृष्टीमुळे पिक वाहून गेल्याचे निदर्शनास आणून दिले. आमदार श्री.क्षीरसागर यांनी ग्रामीण व शहरी भागात अतिवृष्टीमुळे झालेल्या नुकसानीची माहिती दिली . आमदार श्री.पवार यांनी गेवराई तालुक्यातील गोदावरी काठच्या राजापूर सह काही गावांचा नदीच्या पाण्यामुळे संपर्क तुटत असल्याचे सांगितले. आमदार श्रीमती मुंदडा यांनी शेतकऱ्यांना नुकसान भरपाईची माहिती गाव पातळीवर सादर करण्यास अडचणी येत असल्याचे निदर्शनास आणले. याप्रसंगी चर्चेमध्ये बिगर कर्जदार शेतकऱ्यांना अनुदानाचा लाभ मिळावा आणि यासाठी हेक्‍टरी सरसकट मदत मिळावी. विमाभरपाई मिळावी यासाठी त्यांचा अर्ज भरुन घेतला जावा या मुद्द्यांकडे त्यांनी यावेळी लक्ष वेधले.

जिल्हा अधीक्षक कृषी अधिकारी श्री निकम यांनी यावेळी जिल्ह्यात झालेल्या पावसाच्या तसेच पिक नुकसानीचे माहिती सादर केली . यावेळी बैठकीत मागील हंगामातील पिक विमा नुकसानीच्या अनुषंगाने विमा कंपन्यांकडून देण्यात आलेल्या भरपाई बाबतची माहिती सादर करण्यात आली. तसेच पीक विमा न मिळालेल्या शेतकऱ्यांकडून प्राप्त झालेल्या तक्रारींबाबत चर्चा झाली. यावेळी सदर विमा कंपन्यांनी या शेतकऱ्यांच्या प्रकरणांमध्ये त्यांचे क्लेम सेटल करून करून त्यांच्या रक्कमा बँक खात्यात लवकरात लवकर जमा कराव्यात व त्याची सविस्तर माहिती सादर करावी अन्यथा त्यांच्यावर कारवाई केली जाईल, असे सांगण्यात आले.

Monday 4th of November 2019 08:30 PM

Advertisement

Advertisement